३ पुस, काठमाडौं । एसीसी अण्डर नाइन्टिन एशिया कप क्रिकेट अन्तर्गत समूहको तेस्रो खेलमा मलेसियाले नेपालसामू १५४ रनको बिजयलक्ष्य पेश गरेको छ ।
टस हारेर ब्याटिङ गरेको मलेसियाले ४४.४ ओभरमा सबै विकेट गुमाउँदै १५३ रनको योगफल बनायो ।
नेपाल केहिबेरमा जवाफी ब्याटिङमा उत्रँदैछ ।
मलेसियाका लागि बिरनदीप सिंहले सर्बाधिक ७५ रनको अर्धशतकीय पारी खेले । उनले १२० बलको सामना गरी ७ चौका प्रहार गरेका थिए ।
उनका अलावा मलेसियाका मोहम्मद हसिफ २१ र सेफ उल्लाह मलिकले ११ रन जोड्नुबाहेक अन्यले दोहोरो अंकको रन बनाउन सकेनन् ।
बलिङतर्फ नेपालका अदिल खानले ३ तथा कप्तान सन्दीप लामिछाने र दिपेन्द्र सिंह ऐरीले २/२ विकेट लिए ।
यसअघिका दुई खेलमा श्रीलंका र भारतसँग पराजित भइसकेको नेपाल प्रतियोगिताबाट बाहिरिइसकेको छ ।